Tywydd da i chwïaid

Ar ddydd Gwener, bu criw ohonom o'r swyddfa i Lanarthne i gyfarfod y Cwac-pac yn y gwynt a'r glaw. Cawsom groeso mawr gan Meirion a Glenda, a chyfle i hel y chwïaid trwy gyfres o glwydi gyda chymorth Glen, y ci defaid. Yn wir, er mai'r chwïaid oedd yr atyniad mawr, ufudd-dod Glen i'w feistr, a gallu'r ddau i gyd-weithio mor effeithiol oedd y rhyfeddod mwyaf.

Wrth wylio'r ci a'r chwïaid, bûm yn ceisio dyfalu beth oedd yn mynd trwy feddwl yr anifeiliaid. Ac, fel mae'n digwydd, yr hyn oedd ar glawr cylchgrawn a brynais heddiw oedd llun o gi defaid a'r geiriau 'Inside Animal Minds' ...

Mae gwyddonwyr yn honni fod rhai anifeiliaid yn fwy deallus nag a dybiwyd. Mae arbrofion yn dangos fod nifer o rywogaethau yn ddangos arwyddion o allu meddyliol uwch: cof da, gafael ar ramadeg a symbolau, hunan-ymwybyddiaeth, dealltwriaeth o gymhellion anifeiliaid eraill, y gallu i ddynwared a chreadigrwydd.

Ymhlith yr enghreifftiau mwyaf diddorol oedd gallu'r eliffant i sylweddoli mai adlewyrchiad ohono'i hun sydd ar wyneb y dŵr, a'i ddefnyddio fel drych i gyffwrdd â rhannau o'i gorff nad yw'n eu gweld fel arall. Mae'n debyg fod hyd yn oed defaid yn gallu cofio ac adnabod wynebau defaid eraill a phobl am gyfnod o ddwy flynedd.

Mae'n ddigon anodd deall sut mae rhai o'm rhywogaeth fy hun yn meddwl, heb sôn am rywogaethau eraill. Bûm yn chwilio am enghreifftiau o gŵn defaid deallus ar youtube a dyma un fideo y deuthum ar ei draws o dan y disgrifiad 'Border Collies: a very smart and intelligent animal' (cofiwch roi'r sain ymlaen cyn ei wylio). Nid yn unig y mae rhywun wedi mynd i'r trafferth o'i gynhyrchu, ond mae dros 7,500 o bobl wedi ei wylio a rhai ohonynt wedi gadael sylwadau. 'The mind boggles', ys dywed y Sais.