Disclaimer (atodiad i'r blogiad blaenorol)

Dylwn nodi nad yw El Jefe na minnau wedi, nac yn bwriadu, lladd moch daear na gwenoliaid. Deallaf fod hynny yn erbyn y gyfraith a'm bod o bosib wedi codi gwrychyn ambell i gyfaill anifeiliaid sy'n ymweld a'r blog!

Mae Rodrigo yn dweud mai ymosod ar nythod gwenoliaid gydag ysgub pan fyddan nhw oddi cartref yw'r dull o'u rheoli yn Capilla Curig. Mae hynny yn swnio'n llawer mwy 'adargarol', ond byddaf yn pwyntio'r gwenoliaid blin i gyfeiriad y Lanfa pan ddaw'r Gwanwyn!

Un wennol ni wna lanast

Pan symudodd Bojas Rojas a minnau i La Tienda Vieja ar ddechrau'r haf roeddem wrth ein bodd gyda'r bywyd gwyllt oedd i'w weld yng nghefn gwlad Ceredigion.

Yn wir, er bod gan Bojas Rojas ffobia adar, roeddem yn falch o weld gwenoliaid yn nythu dan y bondo ar wep ein cartref newydd.

Ychydig a wyddem bryd hynny fod yr adar bach bywiog hyn yn greaduriaid mor ffiaidd a digywilydd ...

Dim ond rhyw fis sydd wedi mynd heibio ers i mi olchi'r ciosg teliffon sydd o flaen La Tienda Vieja ac mae'r gwenoliaid wedi "gwneud rhifyn" drosto i gyd!

Fel mae'n digwydd, mae El Jefe a minnau wedi bod yn ystyried prynu arfau aer ers rhai wythnosau gan drafod targedau posibl, o foch daear i gylchoedd lliwgar ar bapur. Rwyf bellach yn gwybod yn union pwy fydd ein targed ...

Gwyl y Cobiau, Aberaeron, 10.08.08

Yr unig gob ro'n i'n gwybod amdano cyn hyn oedd yr un rhwng Porthmadog a Phenrhyndeudraeth, felly bu Sul y Cobiau yn agoriad llygad!

Dwylo blewog El Jefe

Rwyf wedi clywed Mujer Superior yn dweud lawer gwaith fod gan El Jefe ddwylo blewog. Pan fydd yn tynnu lluniau gyda'i chamera, bydd yn sleifio i fyny y tu ôl iddi ac yn dwyn y llun gyda'i gamera ei hun. Mae'n ddrwg gen i ddweud fy mod innau hefyd wedi cael y profiad hwn dros y penwythnos ...

Pan oeddem yn yr Harbwrfeistr dros y penwythnos, gwelais gyfle i dynnu llun diddorol o adlewyrchiad o'r dafarn mewn lamp grôm. Os cymerwch gip ar flog El Jefe, fe welwch ei fod wedi cymryd yr union lun hwnnw ychydig eiliadau yn ddiweddarach!

Mae'n wir fod ganddo well cyfarpar na mi ar gyfer tynnu lluniau, ond hyd yn oed gyda'r camera gorau yn y byd rhaid cael llygad am lun ...

(A dyma fi wedi talu'r pwyth yn ôl. Mae ei lun mor debyg i f'un i fel nad wyf wedi trafferthu ei lawrlwytho oddi ar y camera a mynd yn syth i flog El Jefe i'w fachu!)